Melike Pala
09 Јануари 2026•Ажурирај: 09 Јануари 2026
БРИСЕЛ (AA) – Бурата Горети во текот на ноќта ја зафати Западна Франција, носејќи силни ветрови, крајбрежни поплави и сериозни нарушувања во сообраќајот и инфраструктурата, при што околу 380.000 домаќинства останаа без електрична енергија, соопшти францускиот оператор на електричната мрежа „Енедис“, јавува Анадолу.
Прекини во снабдувањето со струја беа пријавени во неколку западни региони откако силни налети на ветер ја зафатија земјата од синоќа до утринава. Во департманот Манш, во градот Гатвил е регистриран налет на ветер од 213 километри на час, објави телевизијата БФМТВ.
Бурата предизвика и прекини во телекомуникациската инфраструктура, при што повеќе од 400 мобилни антени останаа надвор од функција низ Нормандија, јави БФМТВ.
Најголема материјална штета е пријавена во Нормандија, каде што паднатите дрвја ги блокираа патиштата и ги оштетија далноводите, што доведе до масовни прекини на електричната енергија. Итните служби работеа во текот на ноќта на расчистување на теренот и обновување на пристапот до погодените области.
Во Барфлер, каде што беа регистрирани најсилни налети, ветерот надминуваше просечно 100 километри на час повеќе од два часа, со 10-минутен просек од 118 километри на час во 00:12 часот по локално време, соопштија надлежните.
„Метео-Франс“ соопшти дека висината на брановите кај брегот на Бретања достигнала од 10 до 13 метри, особено во близина на Бел-Ил-ан-Мер и Уесан.
Во департманот Сом, крајбрежниот град Каје-сур-Мер беше погоден од поплави, при што во некои улици водата достигнала висина до 40 сантиметри, според соопштението на префектурата.
Како мерка на претпазливост, сите основни и средни училишта во департманите Манш и Сен-Маритим денес се затворени, а училишниот превоз е прекинат.
Железничкиот сообраќај, исто така, беше значително нарушен. Француската национална железничка компанија СНЦФ соопшти дека повеќе возни линии биле откажани низ Северна Франција поради лошите временски услови и им препорача на патниците да ги проверат информациите пред патување.
Француското Министерство за внатрешни работи соопшти дека на национално ниво најмалку шест лица се здобиле со полесни повреди, додавајќи дека до 8 часот наутро по локално време не се пријавени тешки повреди.
„Метео-Франс“ информира дека најголем дел од предупредувањата за силен ветер биле укинати до утринава, при што само департманите Ланд и Пирине-Атлантик остануваат под портокалово предупредување поради силни ветрови.
