Велика Британија ќе развива нови тактички балистички ракети за Украина
Иницијативата има цел да ја зајакне британската одбранбена индустрија преку поттикнување иновации и раст, како и да ја засили поддршката за Украина во услови на војна со Русија
ЛОНДОН (АА) – Велика Британија соопшти дека ќе развива нови тактички балистички ракети за зајакнување на одбраната на Украина, како дел од зголемената поддршка за земјата во 2026 година, јавува Анадолу.
Во рамките на проектот „Најтфол“, Велика Британија започна натпревар за брз развој на копнено лансирани балистички ракети за Украина, кои би можеле да носат боева глава од 200 килограми и да имаат дострел поголем од 500 километри, соопшти Министерството за одбрана доцна синоќа.
Иницијативата има цел да ја зајакне британската одбранбена индустрија преку поттикнување иновации и раст, како и да ја засили поддршката за Украина во услови на војна со Русија.
„Ракетите 'Најтфол' ќе може да бидат лансирани од различни возила, испукувајќи повеќе ракети во брз редослед и повлекувајќи се за неколку минути – дозволувајќи им на украинските сили да погодат клучни воени цели пред руските сили да можат да одговорат“, соопшти Министерството.
Програмата, со максимална цена од 800.000 фунти (околу 1 милион долари) по ракета, има цел да ѝ обезбеди на Украина „моќна и економична опција за уреди со долг дострел со минимална контрола на странски извоз.
Обвинувајќи го рускиот претседател Владимир Путин за „сериозно ескалирање“ на војната наместо „сериозно преговарање за мир“, министерот за одбрана Џон Хили рече дека бил доволно блиску за да ги слушне сирените за воздушен напад околу Лавов на своето патување до Киев минатата недела.
„Решени сме на Украинците да им дадеме најсовремено оружје во раце додека возвраќаат“, рече тој во изјавата.
Лук Полард, министер за одбранбена подготвеност и индустрија, рече дека на безбедна Европа ѝ е потребна силна Украина, а овие нови британски ракети со долг дострел „ќе ја одржат Украина во борбата“.
Тој додаде дека во проектот е предвидено три индустриски тима да добијат договори во вредност од по 9 милиони фунти (околу 12 милиони долари) за дизајн, развој и испорака на првите три ракети во рок од 12 месеци, кои ќе се користат за тестирања.
