Ayhan Şimşek
02 Февруари 2026•Ажурирај: 03 Февруари 2026
БЕРЛИН (АА) – Резервите на природен гас во Германија значително се намалија поради екстремно ниските температури, што поттикна повици на опозицијата за итни мерки, со цел да се спречи можна енергетска криза, јавува Анадолу.
Според официјалните податоци, капацитетот на складиштата за гас на 1 февруари 2026 година изнесувал 32,9 проценти, што претставува остар пад во споредба со 56,4 проценти во истиот период минатата година и околу 57 проценти кон крајот на декември 2025 година.
Намалувањето се должи на зголемената потрошувачка за греење за време на една од најстудените зими во последните години.
Портпаролот за енергетска политика на опозициската Зелена партија, Михаел Келнер, ја критикуваше Владата, оценувајќи дека била „слабо подготвена“ за ваква состојба и предупреди на можен недостиг на гас во наредниот период.
„Ние се тресеме од студ додека ја минуваме оваа зима“, изјави тој за јавниот радиодифузен сервис АРД, додавајќи дека Министерството треба итно да повика на штедење на гас за да се избегне поголема криза.
Од друга страна, министерката за економија Катарина Рајхе ја минимизираше загриженоста околу намалените резерви.
„Состојбата ја следиме секојдневно – нема причина за загриженост“, изјави таа за време на посетата на Саудиска Арабија.
Рајхе ја истакна способноста на Германија да увезува течен природен гас (LNG) од странство и изрази уверување дека земјата ќе ја помине зимата без поголеми проблеми.
Германија се соочува со предизвици во обезбедувањето стабилно снабдување со енергија откако ги прекина увозите од Русија по почетокот на војната меѓу Русија и Украина во 2022 година. Пред конфликтот, Русија обезбедуваше речиси 55 проценти од природниот гас и 35 проценти од суровата нафта за Германија.
Оттогаш, земјата се сврти кон алтернативни извори од Норвешка, Холандија и Белгија, но по значително повисоки цени. Главните пристаништа во Белгија и Холандија служат како точки за прием на течен природен гас, кој потоа се транспортира до Германија.
Најголем дел од течниот природен гас што го увезува Германија доаѓа од САД.
