Rabia İclal Turan
11 Март 2026•Ажурирај: 12 Март 2026
ВАШИНГТОН (АА) – Американскиот државен секретар Марко Рубио оствари телефонски разговор со британската министерка за надворешни работи Ивет Купер, при што фокусот беше ставен на Иран и регионалната безбедност, соопшти Стејт департментот, пренесува Анадолу.
Во официјалното соопштение се наведува дека Рубио и Купер „ја нагласиле важноста од продолжување на блиската координација за безбедноста на поширокиот Блиски Исток“.
Разговорот се реализира во период кога се појавуваат одредени разлики во ставовите меѓу Вашингтон и Лондон во врска со војната на САД и Израел против Иран. Претседателот Доналд Трамп неодамна изјави дека на САД „не им се потребни британски носачи на авиони“ на Блискиот Исток.
Трамп упати критики и до британскиот премиер Кир Стармер поради првичното одбивање да ги поддржи нападите врз Иран предводени од САД, сугерирајќи дека подоцнежното вклучување на Британија било непотребно.
„Не ни требаат луѓе што се приклучуваат во војни откако ние веќе сме победиле“, изјави Трамп.
Подоцна Даунинг стрит одобри ограничена употреба на британските воздухопловни бази за дефанзивни операции, а авиони на Кралските воздухопловни сили беа распоредени за пресретнување на ирански ракети и беспилотни летала насочени кон регионалните сојузници.
Тензиите ескалираа откако Израел и САД започнаа заеднички напади врз Иран на 28 февруари, во кои досега загинаа околу 1.300 луѓе, меѓу кои и врховниот лидер ајатолахот Али Хаменеи, а 10.000 се повредени.
Иран возврати со напади со беспилотни летала и ракети насочени кон Израел, Јордан, Ирак и неколку земји од Персискиот Залив каде што има американски воени бази.
