Австралискиот милијардер Ендрју Форест донира 10 милиони долари за Газа

АНКАРА (АА) - Австралискиот милијардер Ендрју Форест денес најави дополнителна донација од 10 милиони долари преку неговата фондација „Миндеро“ за поддршка на итните напори за доставување хуманитарна помош во Газа, јавува Анадолу.

Со оваа најнова донација, Форест и неговата сопруга Никола Форест ја зголемија вкупната помош од нивната фондација на речиси 28 милиони долари, фокусирајќи се на партнерите кои им доставуваат оброци на оние кои се соочуваат со глад.

Од новите средства, 5 милиони долари ќе бидат наменети за Светската централна кујна за над 1,5 милиони оброци во Газа. Дополнителни 5 милиони долари ќе бидат алоцирани за Светската програма за храна на ОН, која обезбедува помош во храна за регионот.

Од октомври минатата година, финансиската поддршка на „Миндеро“ помогна за испорачување безбедна вода за пиење, канализација, медицински материјали, медицински консултации и помош во храна за десетици илјади луѓе во Газа, соопшти фондацијата.

„Фондацијата Миндеро нема да седи со скрстени раце додека децата умираат од глад“, изјави Форест, повикувајќи на поголема реакција од филантропите и приватниот сектор во врска со хуманитарната криза во Газа.

Израелската офанзива, која започна на 7 октомври, го расели речиси целото население на Газа, оставајќи ја територијата во очајна потреба од храна, чиста вода и лекови поради тековната блокада.