Servet Günerigök
03 Септември 2022•Ажурирај: 05 Септември 2022
ВАШИНГТОН (АА) - Американскиот Стејт департмент одобри продажба на проектили, радарски систем и соодветна опрема во вредност од 1,1 милијарда долари на Тајван, соопшти Пентагон, јавува Агенција Анадолија (АА).
Најголемата сума од продажбата, околу 665,4 милиони долари, отпаѓа на Програмата за радарски надзор и пропратната опрема.
Продажбата вклучува и 60 проектили АГМ-84Л-1 Харпун блок II и соодветна опрема за 355 милиони долари и 100 тактички проектили АИМ-9X Блок II Сајдвајндер, како и четири единици за тактичко наведување АИМ-9X Блок II и соодветна опрема за 85,6 милиони долари.
Конгресот е известен за продажбата, соопшти Агенцијата за одбранбено-безбедносна соработка. Барањата беа поднесени од Канцеларијата за економско и културно претставништво на Тајпеј во Соединетите Американски Држави или TECRO.
Продажбата ќе ја подобри подготвеноста на Тајван да одговори на сегашните и идните закани и ќе помогне да се зголеми неговата ефикасност, и да се зголеми постојната копнена и воздушна одбрана, се вели во соопштението на Агенцијата.
Односите меѓу Вашингтон и Пекинг значително се расипаа во последните недели по посетата на претседателката на Претставничкиот дом на САД, Ненси Пелоси, на Тајван, што беше реализирана и покрај континуираните предупредувања од Кина.
Кина го сметаше патувањето како закана за нејзините претензии за суверенитет на островот, кој е самоуправа од 1949 година. Кина го гледа Тајван како отцепена своја провинција и вети дека ќе го обедини со континентална Кина и преку сила доколку е потребно.
Кина, исто така, континуирано спроведува воени вежби околу Тајван, што вклучуваа лансирање ракети и големо распоредување на бродови и авиони.
Освен покажувањето воена моќ, Пекинг го намали воениот дијалог со САД и ја прекина соработката за прашањата за климатските промени, заедно со шест други контрамерки.
