Rabia İclal Turan
22 Јануари 2023•Ажурирај: 23 Јануари 2023
ВАШИНГТОН (АА) - Американското Министерство за правда изврши претрес во домот на претседателот Џо Бајден во Вилмингтон, Делавер, и пронајде уште шест доверливи документи, објави адвокатот на Бајден доцна синоќа, јавува Агенција Анадолија (АА).
„Министерството за правда одзеде материјали во рамките на својата истрага, меѓу кои и шест предмети што се состојат од документи со ознаки „доверливо“ и други материјали, од кои некои беа од работата на претседателот во Сенатот, а некои беа од неговиот мандат како потпретседател“, рече Боб Бауер за претресот што траеше скоро 13 часа во петокот.
Во соопштението се истакнува дека земени се и рачно пишани белешки од годините кога Бајден беше потпретседател за нивно „понатамошно разгледување“.
Канцеларијата на советот на Белата куќа соопшти дека ниту претседателот ниту првата дама не биле присутни за време на претресот.
Шесте документи се дел од доверливите владини документи пронајдени во приватната канцеларија и домот на Бајден во последните недели.
Првите документи беа откриени на 2 ноември во неговата поранешна канцеларија во центарот Пен Бајден во Вашингтон, од администрацијата Обама - Бајден, шест дена пред средномандатните избори.
Потоа следуваше откривање на дополнителни доверливи документи на 20 декември во гаражата на Бајден, а потоа и во неговиот дом во Делавер.
Документите, наводно, содржат белешки од американското разузнавање и брифинг-материјали за периодот од 2013 и 2016 година поврзани со Украина, Иран и Велика Британија.
Американскиот државен обвинител Мерик Гарланд минатата недела соопшти назначување специјален совет што ќе ги испита доверливите документи пронајдени на адресите поврзани со Бајден.
Белата куќа е под зголемен притисок од републиканците во Конгресот и медиумите што не открила дека документите биле пронајдени пред изборите.
Републиканците, исто така, повлекоа паралели меѓу Бајден и поранешниот претседател Доналд Трамп за држењето доверливи документи во неговиот дом во одморалиштето Мар-а-Лаго.
Демократите возвратија дека Трамп држел стотици документи, а не неколку кои се пронајдени на адресите на Бајден, и посочија дека Бајден веднаш ги предал документите на властите, додека Трамп одбил да ги предаде.
