Анкета: 80% од Германците се против смртоносната воена кампања на Израел во Газа

БЕРЛИН (АА) – Околу 80% од граѓаните на Германија ја отфрлаат смртоносната воена кампања на Израел во Појасот Газа, а 75% сметаат дека германската Влада треба да изврши поголем притисок врз Израел, вклучително и со воведување санкции, покажува анкетата објавена од германскиот магазин Фокус.

Дополнително, 40% од испитаниците сметаат дека Израел ги надминал границите во својата борба против Хамас.

Анкетата укажува и на тренд во однос на возраста – колку што се помлади Германците, толку е поголемо нивното противење на воените дејства на Израел во Газа.

Интересно е што анкетата покажува дека Германија има највисока стапка на одбивање на израелската офанзива од сите европски земји.

Последните месеци низ земјата се одржуваат масовни демонстрации, при што илјадници граѓани излегуваат на улиците за да го изразат својот протест поради, како што ги нарекуваат, израелските воени злосторства во Газа.

Соочувајќи се со зголемен јавен притисок, канцеларот Фридрих Мерц на 28 јули изјави дека неговата Влада размислува за зголемување на притисокот врз Израел поради влошената хуманитарна состојба во енклавата.

Германија традиционално се смета за силен поддржувач на Израел, со постојани изјави од политичките лидери дека земјата има историска одговорност кон Израел поради нацистичкото минато и холокаустот извршен врз Евреите за време на Втората светска војна.

Според последните податоци, од октомври 2023 година досега Израел уби повеќе од 60.000 луѓе во Појасот Газа. Блокадата на територијата предизвика сериозен недостиг на храна и случаи на смрт поради глад.