Анкета: Повеќе од 50 % од Американците имаат неповолно мислење за Трамп

Новата анкета покажа дека мнозинството Американци имаат неповолно мислење за американскиот претседател Доналд Трамп, а поддршката опаѓа поради економската загриженост и неговата најнова трговска политика, јавува Анадолу.

„Американците гледаат на Трамп многу понеповолно отколку на почетокот на неговиот мандат. 54 отсто од Американците имаат многу или донекаде неповолен став за Трамп, додека 43 отсто го гледаат позитивно“, се вели во истражувањето спроведено од „The ​​Economist“ и „YouGov“ во периодот помеѓу 5 и 8 април.

Според анкетата, 51 отсто од Американците не го одобруваат целокупното работење на Трамп, во споредба со 43 отсто кои го одобруваат – што е пад од пет поени за една недела.

Истражувањето, исто така, покажа пад во однос на справувањето на Трамп со економијата, за што 51 отсто не го одобруваат неговиот пристап кон економијата, а 55 отсто рекле дека не ги одобруваат начините на кои тој се справува со цените.

По најавата на Трамп за минимална царина од 10 отсто за увозот, истражувањето покажа дека 52 отсто не ги одобруваат новите царини, а 80 отсто сметаат дека царините ќе ги зголемат цените на производите.

Само 4 отсто од Американците очекуваат цените да се намалуваат поради царините.

На прашањето за изјавите на Трамп за останување на функцијата по неговиот сегашен мандат, истражувањето покажа дека 52 отсто од Американците мислат дека Трамп ќе се обиде да се кандидира за трет мандат, и покрај уставните ограничувања.

Сепак, само 17 отсто велат дека треба, а 8 отсто сметаат дека Уставот го дозволува тоа.