Mohammad Sıo
31 Јануари 2025•Ажурирај: 31 Јануари 2025
ИСТАНБУЛ - Во својот прв говор пренесуван телевизиски откако е назначен за привремен претседател на Сирија, Ахмед ал-Шара, вечерва ја претстави Мапата на патот за иднината на земјата по падот на режимот на Асад, јавува Анадолу.
Неговите планови вклучуваат формирање на две комисии, една за избор на помал Парламент и друга за подготовка за конференција за национален дијалог, како и создавање на сеопфатна преодна влада.
„Стојам пред вас денеска, 54 дена по нашето колективно ослободување - ослободувањето на Сирија од оковите на криминалниот режим што нè оптоваруваше со децении“, рече Ал Шара, одбележувајќи го крајот на 54-те години на еден од најрепресивните режими во историјата на Сирија.
Тој истакна дека ја презел функцијата вчера „по опсежни консултации со правни експерти за да се осигура дека политичкиот процес тече според правните норми, давајќи му ја потребната легитимност“.
„Јас ви говорам денес не како владетел, туку како слуга на нашата ранета нација, решена да го постигне единството и оживувањето на Сирија“, рече Ал Шара, нагласувајќи дека ова е преодна фаза, дел од политички процес кој бара вистинско учество на сите Сиријци, и од земјата и од странство, за изградба на иднина заснована на слобода и достоинство, без исклучувања или маргинализација.
Ал Шара истакна дека неговата администрација ќе се фокусира на формирање „сеопфатна преодна влада што ќе ја претставува различноста на Сирија, мажи, жени и младината, за да ги обнови институциите во земјата додека не се одржат слободни и фер избори“.
Тој потоа ги наведе непосредните чекори за иднината на земјата, истакнувајќи: „Врз основа на мојот мандат и одлуката за распуштање на претходниот Парламент, ќе најавам подготвителна комисија за избор на помало законодавно тело за пополнување на празнината во текот на транзицијата“.
„Во наредните денови ќе ја објавиме подготвителната комисија за конференцијата за национален дијалог, кој ќе послужи како директна платформа за разговори и консултации со цел да се слушнат различни ставови за нашата претстојна политичка агенда“, нагласи тој.
„Откако ќе се завршат овие чекори, ќе ја објавиме уставната декларација, која ќе послужи како правна референца за преодната фаза“, рече Ал Шара.
Башар ал-Асад, лидер на Сирија речиси 25 години, побегна во Русија откако антирежимските групи ја презедоа контролата врз Дамаск на 8 декември, ставајќи крај на режимот на партијата Баат, која беше на власт од 1963 година.
