Бајден: „Ќе продолжиме директно да го помагаме и поддржуваме украинскиот народ“

ВАШИНГТОН (АА) ‒ Американскиот претседател Џо Бајден изјави дека Русија неселективно извршува ракетни напади врз Украина и затоа цивилите мора да се засолнат во метростаниците, јавува Агенција Анадолија (АА).

Говорејќи пред новинарите во Белата куќа, Бајден зборуваше за војната меѓу Русија и Украина.

Тој потсети дека САД вовеле остри економски санкции за рускиот претседател Владимир Путин и луѓето блиски до рускиот лидер.

„Го блокираме нивниот пристап до технологијата и до националниот финансиски систем. Резултатите од тоа се веќе видливи“, рече Бајден.

Тој нагласи дека додека воведуваат санкции кон Путин на највисоко ниво, се обидуваат да ги намалат ефектите од тоа врз САД и другите земји.

„Во моето обраќање до нацијата, реков дека американското Министерство за правда ќе ги нападне руските олигарси. Додека овие луѓе ги полнат своите џебови со пари од рускиот народ, луѓето во Украина се кријат во метростаниците, бидејќи се кријат од руските неселективни проектили“, рече Бајден.

Тој потсети дека САД вчера вовеле санкции за одредени руски олигарси и членови на нивните семејства.

„Од друга страна, ќе продолжиме да го поддржуваме украинскиот народ со наша директна помош“, рече американскиот претседател.

Нападот на Русија врз Украина, кој започна на 24 февруари, предизвика гнев кај меѓународната заедница, а Европската Унија, Велика Британија, Канада, Јапонија и Соединетите Американски Држави воведоа економски санкции кон Москва.

Според податоците на ОН, од почетокот на војната во Украина се убиени 227 цивили, а 525 се ранети. Украинските власти проценуваат дека бројот на загинати е поголем од 2.000. Високиот комесаријат за бегалци на Обединетите нации (УНХЦР) проценува дека повеќе од еден милион луѓе избегале во соседните земји.