Бил Гејтс се сретна со Трамп во Белата куќа за да разговараат за глобалното здравје

ВАШИНГТОН (АА) - Kоосновачот на „Мајкрософт“, Бил Гејтс, се сретна со американскиот претседател Доналд Трамп вчера попладне во Белата куќа, јавува Анадолу.

„Ен-би-си њуз“ соопшти дека висок функционер на Белата куќа го потврдил закажаниот состанок, додека портпаролот на Гејтс истакна дека дискусијата се фокусирала на „важноста на американските глобални здравствени програми и здравствените истражувања што се неопходни за спасување животи, заштита на здравјето на Американците и зачувување на американското лидерство во светот“.

Претходно овој месец, Фондацијата Гејтс објави дека ќе издвои 2,5 милијарди долари до 2030 година за решавање на запоставените области на истражување и развој на здравјето на жените на глобално ниво.

Белата куќа јавно не ја потврди средбата, а Гејтс не објави лична изјава.