Витлеем: Израелските војници повторно интервенираа со гумени куршуми и солзавец

ВИТЛЕЕМ (АА) - Израелските војници и денес интервенираа за време на протестите организирани во Витлеем, на Западниот Брег, поради неодамнешната одлука на Соединетите Американски Држави (САД) за признавање на Ерусалим (Кудс) за главен град на Израел, јавува Anadolu Agency (AA).

За време на протестот, израелските војници користеа гумени куршуми и солзавец. Десетици Палестинци се собраа во западниот дел на градот.

Тие извикуваа слогани против владата на Вашингтон и носеа знамиња на земјите кои дадоа глас за резолуцијата со која се повикуваат САД да го повлечат контроверзното признание, а кое во Генералното собрание на ОН беше усвоено во четвртокот.

Голем број Палестинци имаа симптоми на гушење од солзавецот.

На 6. декември, американскиот претседател Доналд Трамп го призна Ерусалим (Кудс) за главен град на Израел и го најави преместувањето на американската амбасада од Тел Авив во Кудс. Оттогаш протестите се одржуваат во различни делови на светот.

Во четвртокот, Генералното собрание на Обединетите нации со 128 гласа за и девет против, ја изгласа резолуцијата со која се повикуваат САД да го повлечат контроверзното признавање.