Во нови израелски напади врз Појасот Газа убиени 16 Палестинци

АНКАРА (АА) – Најмалку 16 Палестинци се убиени утрово во израелски напади врз шатори на раселени лица во Кан Јунис и централна Газа, соопштија медицински извори, јавува Анадолу.

Израелската артилерија гранатираше шатори во кои беа засолнети раселени семејства во областа Асда во северозападниот дел на Кан Јунис, при што убиени се 12 лица, меѓу кои шест деца и едно бебе, а неколку други се повредени.

Во одделен напад, израелско беспилотно летало погоди куќа во бегалскиот камп Магази во централна Газа, при што убиени се две лица, а неколку се повредени.

Болницата Ал-Авда пријави дополнителни жртви откако израелски беспилотни летала погодиле стан во бегалскиот камп Нусејрат.

Болницата соопшти дека примила две тела и 26 повредени во последните 24 часа, главно од напади со беспилотни летала врз станбени области и собири во близина на точките за дистрибуција на помош јужно од Вади Газа.

Израел уби речиси 62.300 Палестинци во Газа од октомври 2023 година. Воената кампања ја опустоши енклавата, која се соочува со глад.

Минатиот ноември, Меѓународниот кривичен суд издаде налози за апсење на Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејства во енклавата.