Новинари на Ројтерс проговорија за произраелска пристрасност на уредниците и менаџментот

Повеќемина вработени во британската новинска агенција Ројтерс во извештај објавен вчера проговорија за произраелска пристрасност меѓу уредниците и менаџментот на компанијата, пренесува Анадолу.

Последниот инцидент што доведе до реакција поради пристрасното известување на Ројтерс беше кога Израел го уби палестинскиот новинар Анас ал-Шериф претходно овој месец. Иако Ал Шариф претходно работеше за новинската агенција, дури и ја освои Пулицеровата награда во 2024 година за својата работа таму, Ројтерс го користеше насловот „Израел го уби новинарот на Ал Џезира за кој вели дека бил лидер во Хамас“ за нивното известување за смртта на Ал Шариф.

Јавната реакција не беше ограничена само на публиката од милијарда луѓе на глобалната новинска агенција, ниту на овој инцидент, бидејќи загриженоста што се предизвика кај некои вработени во Ројтерс предизвика внатрешно преиспитување на пристрасноста во нивното известување.

Интерна студија од новинари на Ројтерс анализираше 499 извештаи означени како „Израел-Палестина“ објавени во периодот помеѓу 7 октомври и 14 ноември 2023 година и откри „конзистентен модел на доделување повеќе ресурси за известување на вести за покривање приказни што ги засегаат Израелците, во однос на Палестинците“, според групата за истражувачко новинарство „Declassified UK“.

„Се спроведе сеопфатна интерна истрага, спроведувајќи и квантитативни и квалитативни анализи на нашето известување“, истакна извор на Ројтерс, кој за „Declassified UK“ изјави: „Неколку недели по нападот на 7 октомври, неколку новинари во Ројтерс увидоа дека нашето известување за војната Израел-Газа нема објективност“.

„Наодите ја формираа основата за отвореното писмо, кое беше споделено интерно за да се идентификуваат и поврзат новинарите во редакцијата кои се посветени на зајакнување на новинарството на Ројтерс за Газа“, рече изворот.

Неговите автори, исто така, се пожалија дека „еден јасен пример за тоа како нашата формулација имплицира пристрасност е во нашиот избор да ја забраниме употребата на зборот „Палестина“... Иако Палестина можеби не е призната како држава во некои западни земји, не треба да се преправаме дека не е реално место“.

Потоа групата праша зошто Ројтерс не објавил повеќе за тврдењата на експертите дека Израел врши геноцид во Газа, споредувајќи го тоа со начинот на кој новинската агенција им пристапила на таквите обвинувања за однесувањето на Русија во Украина.

- Ревизија -

Во однос на критиките, Хауард С. Голер, уредник на редакцијата за квалитет и стил на глобални вести при Ројтерс, испрати и-мејл со наслов „Ажурирање на стилот на Ројтерс за конфликтот на Блискиот Исток“ за ревидирање на уредувачката политика.

Ажурирањето наводно им дозволило на новинарите на Ројтерс да го користат зборот „геноцид“ со наведување на изворот, но сепак го ограничува терминот Палестина при „референци за историска Палестина од дамнешни времиња... до 1948 година“.

Дури и со полабавите ограничувања на терминот „геноцид“, анализата на „UK Declassified“ откри дека Ројтерс го користел зборот само во 14 од 300 објави на својата страница „Израел и Хамас во војна“ во периодот помеѓу 21 јуни и 7 август.

Дури и кога се споменувал зборот геноцид, тоа речиси секогаш било со негирање од страна на Израел - практика на „двоен стандард“ што не им се дава на другите завојувани страни како што се Силите за брза поддршка во Судан или на Русија.

Оваа практика предизвика реакција на личности од социјалните медиуми како што е Асал Рад, експерт за историјата на Блискиот Исток познат како „поправач на наслови“, кој рече: „Моделот што го забележувате е во суштина негирање на геноцидот“.

„Ројтерс ги прикажува злосторствата на Израел во Газа како дел од тековната „војна“ или „воена кампања“, наместо да ги нарекува геноцид, и покрај консензусот меѓу експертите за човекови права и меѓународните институции кои заклучија дека Израел врши геноцид“, рече таа.

- Уредничка „ексклузија“ -

Анализата на „Declassified UK“ покажува дека во и-мејлот на Голер се цитирани делови од стилскиот водич со наслов „Војната во Газа (2023–денес)“ и „Поширок контекст“ кои даваат детали првенствено од перспектива на Израел и не ги споменуваат клучните елементи како што е улогата на САД и Израел во саботирањето на преговорите за прекин на огнот.

Се покажа дека тие целосно го изоставуваат израелскиот нелегален колонијализам и апартхејд и значително го потценуваат обемот на уништување во Палестина.

Дополнително, деловите од ажурираниот стилски водич не ги цитираа наодите на британскиот медицински журнал „The Lancet“, кој „проценува дека до 186.000 или дури и повеќе жртви би можеле да се припишат на сегашниот конфликт во Газа“ и го занемаруваат фактот дека Газа стана смртоносна конфликтна зона за новинарите.

Со оглед на сето ова, портпарол на Ројтерс изјави за „UK Declassified“ дека веруваат дека нивното известување „било фер и непристрасно, во согласност со Принципите на доверба на Томсон Ројтерс“.

„Како и во многу редакции, нашето известување за војната беше под строг надзор, вклучително и од нашите новинари, и се соочивме со реакции од повеќе места“.

Управата на Ројтерс не одговори на прашањата за тоа дали се прифатени одредени препораки од интерната студија.