САД: Мисисипи прогласи вонредна состојба во здравството поради зголемениот број смртни случаи кај новороденчиња

ИСТАНБУЛ (АА) - Министерството за здравство на американската сојузна држава Мисисипи во четвртокот прогласи вонредна состојба во јавното здравство поради зголемените стапки на смртност кај новороденчињата, јавува Анадолу.

Податоците од 2024 година покажуваат дека вкупната стапка на смртност кај новороденчињата во Мисисипи се искачила на 9,7 смртни случаи на 1.000 живородени, што е највисока за повеќе од една деценија. Од 2014 година, 3.527 бебиња починале пред да го имаат својот прв роденден.

„Премногу семејства во Мисисипи ги губат своите бебиња пред нивниот прв роденден“, изјави раководителот за јавно здравство на државата, д-р Ден Едни. „Секоја загуба на новороденче претставува уништено семејство, погодена заедница и скратена иднина.“

Смртните случаи на новороденчиња во Мисисипи најчесто се предизвикани од конгенитални малформации, предвремено породување, ниска родилна тежина и синдром на ненадејна смрт кај новороденчиња, според Одделот за здравство.