Во природните катастрофи во Индонезија загинаа 14 лица

АНКАРА (АА) - Во природните катастрофи во Индонезија загинаа најмалку 14 лица, меѓу кои двајца странци, додека некои луѓе сѐ уште се водат за исчезнати, јавуваат локалните медиуми, пренесува Анадолу.

Во последната несреќа, двајца француски и јужнокорејски туристи загинаа, а шестмина други се повредени кога се урна големо дрво во популарната Шума на мајмуните во селото Падангтегал во Бали, објави во средата „Џакарта глоуб“.

Сите жртви се пренесени во болницата „Кенак Медика“ во Убуд.

„Сè уште собираме податоци за жртвите бидејќи конзулатите нè контактираат за да проверат дали нивните граѓани биле вмешани“, рече претставникот на Агенцијата за ублажување на катастрофи во Џанјар, Густи Нгурах Дибја Пресаста.

Регионот на Бали се соочува со тешки временски услови во декември и досега овој месец се регистрирани 33 несреќи со паѓање дрвја и лизгање на земјиштето предизвикани од обилните дождови и силните ветрови.

Најмалку 12 лица загинаа, а неколку исчезнаа по серијата природни катастрофи во провинцијата Западна Јава во Индонезија минатата недела.

Почнувајќи со лизгање на земјиштето на 4 декември, катастрофите, вклучително и стотици свлечишта, поплави, ветрови и движења на земјата, раселија над 3.000 луѓе низ 172 села, главно во областа Сукабуми.

Метеоролошката агенција на земјата предупреди дека екстремните временски услови може да се задржат до средината на јануари 2025 година во регионот на Бали и други делови на Индонезија.