Полицијата изврши рација во канцеларијата на јужнокорејскиот претседателот Јун

ИСТАНБУЛ (АА) - Јужнокорејската полиција денес изврши рација во канцеларијата на претседателот Јун Сук Јеол, додека се проширува истрагата за неговиот неуспешен обид да воведе воена состојба, јавува Анадолу.

„Рации беа спроведени и во канцелариите на метрополитенската полиција во Сеул и полициската гарда на Националното собрание“, се вели во соопштението на полицијата.

Јун воведе воена состојба ноќта на 3 декември, но 190 пратеници во Парламентот усвоија предлог за нејзино укинување, принудувајќи го да ја поништи одлуката.

Тоа предизвика политичка криза со повици до Јун да поднесе оставка.

63-годишниот претседател се соочува со обвиненија за предавство и бунт и му е забрането патување во странство. Може да се соочи и со апсење.

Поранешниот министер за одбрана на Јун, Ким Јонг-Хјун, се обиде да се самоубие во притвор денес.

Ким беше приведен во неделата, а формално притворен вчера под обвинение за предавство и е обвинет дека е соучесник во воведувањето воена состојба.

Тој е задржан во притворниот центар Донгбу во главниот град Сеул.

Претходно, специјалниот истражен тим на обвинителството пребара и заплени материјал од Командата за специјално војување на Армијата на Јужна Кореја.

Во меѓувреме, претседателот на Парламентот, Ву Вон-шик, се повика на неговите овластувања да формира специјален комитет за да започне парламентарна истрага против Јун.

„Потребна е парламентарна истрага за да се обезбеди јавно сведочење од Јун во врска со воведувањето на воената состојба на 3 декември“, изјави Ву на новинарите.

Додека владејачката Партија на моќта на народот се спротивстави на соборувањето на претседателот преку парламентарно гласање, главната опозициска Демократска партија треба да започне нов предлог за импичмент против Јун денес.

Јун, кој беше избран во 2022 година за петгодишен мандат, го надмина барањето за импичмент минатиот викенд, откако Парламентот не успеа да постигне кворум од 200 пратеници.

Со поддршка на 192 пратеници, опозицискиот блок вчера усвои предлог-закон за назначување специјален советник за истрага против Јун.