АНКАРА (АА)
- Ѓокан ЧЕЛИКЕР / Сумеје ДИЛАРА ДИНЧЕР
Во Појасот Газа во израелските напади од 7 октомври, секој час се убивани по пет деца, јавува Анадолу.
Половина од 2,3 милиони жители на Газа се деца, а бројот на убиени деца во Газа во првите три недели го надмина просечниот број на убиени деца во светот во последните три години.
Според Светската здравствена организација (СЗО), над 40 отсто од 9.061 Палестинец убиени во судирите од 7 октомври се деца.
Според податоците на британската невладина организација „Спасете ги децата“ (Save The Children), врз основа на здравствените власти под контрола на Хамас, над 3.000 деца се убиени во Палестина во период од три недели.
Според податоците на палестинското Министерство за здравство во Газа, Израел во нападите убил 9.061 Палестинец, од кои 3.760 се деца и 2.326 жени, а повредени се најмалку 32.000 лица. Во овој контекст, во Газа секој час гинат по пет деца.
„Спасете ги децата“ објави дека бројот на убиени деца во Палестина во последните три недели е поголем од бројот на деца убиени во период од една година во конфликтите низ светот во 2020, 2021 и 2022 година.
Во извештајот на Канцеларијата на генералниот секретар на Обединетите нации, под наслов „Вооружените конфликти и децата“, беше наведено дека во 2022 година во 24 земји во конфликт загинале 2.985 деца, во 2021 година 2.515, а во 2020 година во 22 земји загинале 2.674 деца.
Иако во извештајот за 2019 година не се дадени информации за бројот на земји, евидентирано е дека 4.019 деца биле убиени во конфликтите низ светот.
Палестинското Министерство за здравство објави извештај од 212 страници во кој се содржани имињата, идентитетот и возраста на загинатите во израелските напади врз Газа во периодот од 7 до 26 октомври. Според тој извештај, 2.913 од 7.028 убиени луѓе во Палестина биле деца.
Во нападите на Израел загинаа 133 бебиња помлади од една година и вкупно 444 дечиња помлади од три години.
Во израелските бомбардирања загинаа 171 дете на возраст од три години, 1.527 деца на училишна возраст (4-13 години) и 523 деца на средношколска возраст (14-17 години).
СЗО објави дека значителен дел од 18.482 лица повредени во Палестина од 7 октомври се деца.
Во извештајот на „Си-ен-ен“, заснован на израелски официјални лица, се вели дека над 1.400 Израелци загинале од 7 октомври, меѓу кои 30 деца.
Портпаролот на УНИЦЕФ, Џејмс Елдер, изјави дека се загрижени поради смртта на децата во Газа, која е под интензивни израелски напади, и дека Газа се претворила во детски гробишта.
Нагласувајќи дека децата во Газа биле негативно погодени од тековниот конфликт од 7 октомври, Елдер рече: „Загрижени сме поради зголемениот број смртни случаи на деца во Газа. Газа се претвора во гробница за деца.“
Елдер го повтори повикот на УНИЦЕФ за итен прекин на огнот и непречена испорака на залихи со хуманитарна помош во Газа.
„Децата во Газа не само што умираат како последица на бомбардирањето, туку умираат и од недостатокот на медицинската нега што им е потребна“, рече Елдер.
Од друга страна, илјадници деца не можеа да се вратат во своите домови во областа Харков, каде што од првиот ден на руско-украинската војна имаше тешки судири и беа уништени многу населени места.
Според податоците на Детскиот фонд на ОН (УНИЦЕФ), Украина има повеќе од шест милиони граѓани на возраст под 18 години. Повеќе од милион се регистрирани во категоријата „под пет години“.
Податоците објавени од Високиот комесаријат за човекови права на ОН (ОХХР) покажаа дека до 10 септември 2023 година, 544 од 9.614 лица кои загинале во руско-украинската војна, што избувна на 24 февруари 2022 година, биле деца. Беше објавено дека 1.180 од 17.535 повредени во војната се деца.
Според податоците на „Спасете ги децата“ (Save the Children) од јули, во руско-украинската војна секој ден во просек се убиени или повредени по три деца.
