Генерален штрајк во Грција поради растечките трошоци за живот

АТИНА (АА) - Работници и државни службеници во Грција денес започнаа 24-часовен генерален штрајк, барајќи итна владина акција против растечките трошоци за живот што сè повеќе ги оптоваруваат домаќинствата во земјата, јавува Анадолу.

Штрајкот е организиран од Генералната конфедерација на грчките работници и Конфедерацијата на јавни службеници, со поддршка од синдикатот ПАМЕ, поврзан со Комунистичката партија на Грција (ККЕ).

Во Атина и во други делови на земјата беа забележани сериозни нарушувања. Јавниот превоз во главниот град целосно беше во прекин, железничките и поморските услуги беа стопирани – возовите откажани, а бродовите останаа закотвени во пристаништата. Беа откажани и повеќе летови, што предизвика дополнителни проблеми за локалното население и туристите.

Во центарот на Атина илјадници граѓани маршираа до грчкиот Парламент, барајќи повисоки плати и критикувајќи го начинот на кој Владата се справува со економската криза. Меѓу демонстрантите беа и голем број пензионери што побараа враќање на 13. и 14. пензија, укинати за време на кризата со долг во 2009 година.

„Овие плаќања беа од витално значење за нашиот опстанок. Нивното губење турна многумина од нас во сиромаштија“, рече еден пензионер.

На протестот беа забележани и палестински знамиња, како знак на солидарност со Палестина поради тековните израелски воени операции.

Слични демонстрации беа одржани и во други градови, вклучително и Солун, каде што работниците и пензионерите повторно ги истакнаа барањата за подобрување на животниот стандард и враќање на загубените права.