Германија ги повика земјите од ЕУ да ја засилат испораката на оружје за Украина

БЕРЛИН (АА) - Германскиот канцелар Олаф Шолц денес ги повика земјите од Европската Унија да ја засилат испораката на оружје за Украина, јавува Анадолу.

Говорејќи пред новинарите во Брисел пред вонредниот самит на ЕУ, Шолц рече дека воените ветувања од партнерите во ЕУ се далеку од доволни, во моменти кога на Украина итно ѝ е потребно повеќе оружје.

„Разговорите мора да започнат веднаш, бидејќи знаеме дека она што е планирано досега, вклучително и конкретни испораки на оружје од поединечни земји членки на ЕУ, не е доволно“, рече тој.

Шолц нагласи дека Германија одлучила да ѝ обезбеди на Украина оружје во вредност од над 7 милијарди евра само оваа година.

„Но, ветувањата дадени од Европската Унија како целина не се доволни. Сега, ќе имаме можност да разговараме за ова, мило ми е за тоа. Денеска не е ден за одлука за ова прашање. Но, секој од нас мора да го разгледа ова, да види каков дополнителен придонес можеме да дадеме за да постигнеме разбирање“, рече германскиот канцелар.

Шолц додаде дека денес главната расправа ќе се фокусира на долгорочната финансиска поддршка на ЕУ за Украина за 2024-2027 година и изрази надеж дека 27-те земји членки ќе можат да донесат одлука за пакетот.

„Ова е околу 12 милијарди евра година, од заеми и директни грантови, вкупно 50 милијарди евра до крајот на финансискиот период, и тоа е исто така итно потребно“, рече тој.

Во декември, лидерите на ЕУ не можеа да се договорат за пакетот помош за Украина поради противењето на Унгарија.