Германскиот канцелар Олаф Шолц со пофалби за Туркије

БЕРЛИН (АА) - Германскиот канцелар Олаф Шолц истакна дека Туркије, која посредуваше за реекспорт на жито во Украина, заслужува благодарност, јавува Агенција Анадолија (АА).

Во своето излагање на Генералното собрание на ОН, Шолц рече: „Овозможувањето повторен извоз на жито со посредство на генералниот секретар Антонио Гутереш и Туркије заслужува голема благодарност.“

Премиерот Шолц нагласи дека неговата земја ја поддржува Украина во извозот на храна.

Критикувајќи го рускиот претседател Владимир Путин за војната против Украина, Шолц рече: „[Владимир] Путин ја води оваа војна само за една цел: да ја заземе Украина. Правото на самоопределување и политичка независност нему не му се важни. За ова има само еден збор, тоа е чист империјализам. Враќањето на империјализмот не е само катастрофа за Европа. Тоа е катастрофа и за нашиот глобален мировен поредок, кој е антитеза на империјализмот и неоколонијализмот. Затоа, многу е важно што 141 држава во оваа сала недвосмислено ја осудија руската освојувачка војна.“

Наведувајќи дека стотици илјади луѓе страдаат во затворски логори или затвори во земји како Северна Кореја, Сирија, Иран или Белорусија, и се подложени на произволно постапување и тортура, Шолц рече: „Исто така, мора да ги видиме овие места и да преземеме акција. Талибанците во Авганистан ги лишуваат жените и девојките од нивните најосновни права. И тоа треба да го видиме и да преземеме акција. Кога Русија ќе изврши воени злосторства во Мариупол, Буча или Ирпин, ние мора да го видиме тоа и да преземеме акција. Убијците треба да одговараат. Ќе им дадеме целосна поддршка на Меѓународниот кривичен суд и Независната истражна комисија формирана од Советот за човекови права.“

Тој потсети дека поранешниот висок комесар за човекови права презентирал извештај за ситуацијата на Ујгурите во Ксинџијанг, и нагласи: „Кина треба да ги спроведе препораките на високиот комесар. Тоа ќе биде знак за суверенитет и за моќ и гаранција за промена на подобро.“