Грузија: Полицијата употреби сила за да ги растера проевропските демонстранти пред Парламентот

ТБИЛИСИ (АА) - Полицијата во грузискиот главен град Тбилиси употреби солзавец и водени топови за да ги растера илјадниците проевропски демонстранти што се обидоа синоќа да го опколат Парламентот, јавува Анадолу.

Последниот инцидент се случи на националните протести што траат веќе петти ден, а кои започнаа откако Владата на премиерот Иракли Кобахиџе на 28 ноември објави дека преговорите за пристапување во Европската Унија (ЕУ) ќе бидат одложени до 2028 година.

Демонстрантите, гневни од одлуката, се собраа пред Парламентот, фрлајќи пиротехнички средства и камења кон полицајците стационирани зад барикадите.

Безбедносните сили одговорија со сила, туркајќи ги демонстрантите од зградата.

За време на судирите беа приведени неколкумина демонстранти.

„Ова е напад врз слободата на изразување и правото на протест - прекршени се основните права“, рече грузискиот претседател Саломе Зурабичвили, критикувајќи ја полициската интервенција.

Претседателот тврдеше дека протестите не личат на ништо во нивната историја (на Грузија), што сугерира дека Грузијците сакаат да си вратат своите „гласови“ и „европска иднина“.

Министерството за внатрешни работи соопшти дека некои групи прибегнале кон насилство за време на демонстрациите.

Се додава дека од почетокот на протестите 113 полицајци биле повредени.

Демонстрантите, наводно, почнале да се растураат околу 6 часот по локално време, при што стотици марширале кон улицата Илија Чавчавадзе.

Кандидатурата на Грузија за членство во ЕУ, иницирана во 2022 година, се соочи со значителни пречки.

Тензиите ескалираа по усвојувањето на контроверзниот Закон за „транспарентност на странско влијание“, за кој критичарите тврдат дека ги ограничува политичките слободи.

Кон крајот на минатиот месец Европскиот парламент повика на нови избори во Грузија, велејќи дека изборите на 26 октомври не биле ниту слободни ниту фер, што ги интензивира протестите предводени од опозициските групи и проевропските активисти.

Кобахиџе ги обвини европските претставници за мешање.

„Имајќи го предвид сето ова, решивме да не го ставаме на дневен ред прашањето за започнување преговори со ЕУ до крајот на 2028 година“, рече тој.