Данска ги заостри мерките за извоз на воена опрема и оружје во Израел

КОПЕНХАГЕН (АА) - Владата на Данска објави дека ќе го имплементира „многу рестриктивниот пристап“ за извоз на воеан опрема и оружје во Израел поради „катастрофалните последици“ од нападите врз Газа, известува Анадолу.

„Како резултат на војната меѓу Израел и Хамас и катастрофалните последици што војната ги има врз цивилното население на Газа, Министерството за надворешни работи на Данска од 25 март 2024 година дополнително го заостри пристапот до извозот на воена опрема во Израел“, соопшти министерот за надворешни работи, Локе Расмунсен.

Тој истакна дека Данска ќе премине од веќе рестриктивниот пристап кон многу рестриктивен пристап кога донесува проценка за специфичната примена за извозот на воени средства во Израел.

„Сиот извоз на оружје во Израел ќе се проценува од случај до случај“, рече Расмунсен.

Министерот Расмунсен нагласи дека одлуката сега ќе се донесува врз основа на „многу рестриктивен пристап“ во согласност со договорот на Обединетите нации (ОН) за трговијата со оружје и правилата на Европската унија (ЕУ) за извозот на оружје.

Владата на Данска воведе ограничувања откако четири организации за човекови права, вклучувајќи ја и Амнести Интернешнал, ја тужеа Данска поради непочитувањето на законската обврска во врска со дозволата за извоз на оружје во Израел.