Делегации од Шведска и Финска ќе ја посетат Турција на консултации за апликациите за членство во НАТО

АНКАРА (АА) - Министерството за надворешни работи на Турција соопшти дека во Турција ќе пристигнат делегации од Шведска и Финска за да се консултираат за апликациите за членство во НАТО, пренесува Агенција Анадолија (АА).

Според соопштението на Министерството, утре во Анкара ќе пристигнат делегации од Шведска и Финска, предводени од државниот секретар на Кабинетот на шведскиот премиер, Оскар Стенстром, и потсекретарот на финското Министерство за надворешни работи, Јука Саловара.

Делегацијата предводена од портпаролот на Претседателството на Турција, Ибрахим Калин, и заменик-министерот за надворешни работи, Седат Онал, и делегациите предводени од Стенстром и Саловара ќе одржат состанок за апликациите на Шведска и Финска за членство во НАТО.