Asiye Latife Yılmaz
17 Ноември 2025•Ажурирај: 18 Ноември 2025
ИСТАНБУЛ (АА) - Гласачите во Еквадор вчера го отфрлија предлогот за дозвола за странски воени бази во земјата, а првичните резултати покажуваат дека речиси две третини гласале „против“ откако биле преброени околу 90% од гласачките ливчиња, јавува Анадолу.
Јавноста го отфрли пакетот од четири члена што го стави на референдум администрацијата на претседателот Даниел Нобоа, насочен кон уставни измени.
Гласачите гласаа за четири клучни прашања, почнувајќи од дозволување на враќање на странски воени бази до изготвување нов устав. Гласовите „против“ водеа со голема разлика по сите прашања.
Според неофицијалните податоци: 61,55% гласаа „не“, а 38,45% „да“ за изготвување нов устав, додека враќањето на странските воени бази доби 60,50% гласови „против“ и 39,50% „за“.
Предлогот за кратење на државното финансирање на партиите беше одбиен со 57,96% „против“ наспроти 42,04% „за“. Мерката за намалување на бројот на пратеници доби 53,41% „против“ и 46,59% „за“.
Нобоа го призна поразот на референдумот и порача дека волјата на народот ќе биде почитувана.
„Нашата посветеност не се менува, таа се зајакнува. Ќе продолжиме да се бориме за државата што ја заслужувате, со алатките што ги имаме“, напиша тој на американската платформа за социјални медиуми Х.
Резултатите претставуваат значаен удар за Нобоа, кој се обидуваше да ја укине забраната од 2008 година за странски воени бази како дел од борбата против растечкото насилство и организираниот криминал – чекор што го поддржуваа и САД, кои сакаат повторно да отворат база на пацифичкиот брег на Еквадор.
