Ел Салвадор двојно ќе го зголеми најголемиот затвор во светот за да смести повеќе депортирани лица од САД

ВАШИНГТОН (АА) - Претседателот на Ел Салвадор, Наиб Букеле, планира двојно да го зголеми капацитетот на најголемиот затвор во светот за да се сместат уште повеќе депортирани лица од САД, објави вчера „Волстрит џурнал“, пренесува Анадолу.

За време на неодамнешната посета на американската секретарка за внатрешна безбедност, Кристи Ноем, Букеле изјави дека има намера да го прошири Центарот за затворање терористи (Цекот), во кој моментно се наоѓаат околу 15.000 затвореници.

Овој затвор, отворен во 2023 година, првично е проектиран да прифати до 40.000 затвореници, а со планираната експанзија неговиот капацитет би се зголемил на 80.000.

Планот се појави во контекст на сѐ поинтензивната соработка меѓу Ел Салвадор и администрацијата на Доналд Трамп, која во оваа централноамериканска држава досега депортирала повеќе од 250 членови на банди, од кои голем дел се државјани на Венецуела.

Американската Влада му плаќа на режимот на Букеле околу 6 милиони долари за сместување на овие затвореници во Цекот.

Исто така, оваа недела сенаторот од Мериленд, Крис Ван Холен, го посети Сан Салвадор во обид да обезбеди ослободување на Килмар Абрего Гарсија, жител на Мериленд што бил депортиран по грешка.