ЕУ ги осудува нападите од војската на Мјанмар врз цивилите

БРИСЕЛ (АА) - Европската Унија (ЕУ) денес ги осуди кршењата на човековите права на цивилите извршени од војската на Мјанмар и повика на итен прекин на непријателствата, пренесува Агенција Анадолија (АА).

Во соопштението објавено на првата годишнина од изборите во Мјанмар, што подоцна резултираа со воен удар, шефот за надворешна политика на ЕУ, Жозеп Борел, рече дека соборувањето на цивилната влада избрана со демократската волја на бурманскиот народ претставува кршење на волјата на народот, со катастрофални хуманитарни, социјални, економски последици и последици за човековите права.

„Европската Унија најостро ги осудува нападите на војската на Мјанмар врз цивилите и селата во државата Чин, вклучително и употребата на тортура, сексуално насилство, произволно притворање и уништување на приватен имот и верски објекти“, нагласи тој, осврнувајќи се на неодамнешното воено засилување во северозападниот дел на земјата.

Тој побара итен прекин на непријателствата и „правда и одговорност“ за оние што ги кршат човековите права и меѓународното право.

Борел ги предупреди воените власти да осигурат безбеден пристап за меѓународните организации за испорака на хуманитарна помош за внатрешно раселените лица. Тој, исто така, вети дека Блокот ќе продолжи да обезбедува помош за Мјанмар.

Тој, исто така, истакна дека Блокот го поздравил назначувањето на Нолин Хејзер за специјален пратеник на ОН за Мјанмар.

На 1 февруари, воената хунта во Мјанмар ја презеде власта по наводите за измама на општите избори на 8 ноември 2020 година и политичката тензија во земјата.

Армијата приведе водачи и функционери на владејачката партија Национална лига за демократија, вклучително и де факто лидерката и државна советничка Аунг Сан Су Чи, и прогласи вонредна состојба на една година.

Минатата недела, генералниот секретар на ОН, Антонио Гутереш, рече дека најмалку 37.000 луѓе, вклучувајќи и жени и деца, се раселени поради неодамнешната ескалација на конфликтот во северозападниот дел на Мјанмар.

Според групата за граѓански права Здружение за помош на политичките затвореници, повеќе од 1.100 луѓе се убиени, а над 9.000 демонстранти се приведени поради бруталното задушување од страна на војската на масовните протести и бунтови против нивното владеење.