Започнаа разговорите на Турција со делегациите од Шведска и Финска

АНКАРА (АА) - Делегации на Турција, Шведска и Финска се состанаа во Анкара на разговори во врска со барањето на Шведска и Финска за пристапување во Северноатлантскиот сојуз (НАТО), јавува Агенција Анадолија (AA).

Состанокот се одржува во комплексот на Претседателската палата во Анкара, а турската делегација ја предводат портпаролот на Кабинетот на претседателот, Ибрахим Калин и заменик-министерот за надворешни работи, Седат Онал.

На чело на шведската делегација е државниот секретар за надворешни работи и безбедност, Оскар Стенстром, а финската делегација ја води Јука Саловара, постојан државен секретар при Министерството за надворешни работи.

Шведска и Финска минатата недела официјално поднесоа барање за влез во НАТО, одлука поттикната од руската војна против Украина, која започна на 24 февруари.

Меѓутоа, Турција, долгогодишна членка на Алијансата, изрази забелешки на нивните кандидатури за членство, критикувајќи ги двете земји дека толерираат, па дури и ги поддржуваат терористичките организации.