Земјотресот во Јапонија причина за смртта на 64 лица, многу луѓе заробени под урнатините

ИСТАНБУЛ (АА) - Бројот на загинати од земјотресот што ја потресе Јапонија се зголеми на 64, а голем број лица и понатаму се заробени под урнатините, пренесува Анадолу.

Потврдено е дека најмалку 64 лица загинале во префектурата Ишикава, сместена покрај брегот на островот Хоншу, објави „Кјодо њуз“ со седиште во Токио.

Премиерот на Јапонија, Кишида Фумио, соопшти дека се во „трка со времето за спасување животи“.

„Луѓето и понатаму се заробени во оштетените или урнатите згради. Владата ќе стори сѐ што може, поставувајќи го спасувањето животи за главен приоритет“, им рече премиерот на новинарите, пренесе јапонската јавна телевизија НХК.

Илјадници луѓе се евакуирани на побезбедни места.

Има голем број повредени во префектурите Ишикава, Нигата, Фукуи, Тојама и Гифу.

Многу подрачја сѐ уште се отсечени поради оштетувањата на патиштата и прекинот на транспортот, а Министерството за одбрана на Јапонија размислува за употреба на хеликоптери за да може да се транспортира хуманитарен материјал.

Државната агенција за метеорологија прогнозираше повремени врнежи од дожд до четврток.

Јапонија мобилизираше околу 10.000 војници за спроведување на операциите за потрага, спасување и давање помош.

Централна Јапонија на 1 јануари попладнето ја потресоа серија земјотреси, од кои најсилниот беше со интензитет од 7,6 степени според Рихтеровата скала, предизвикувајќи голем пожар, а властите дадоа предупредување и за можно цунами.

Власта подоцна го укинаа предупредувањето за цунами.

Епицентарот на земјотресот беше во регионот на полуостровот Ното.