Израелската Армија: Во последните 24 часа извршени се воздушни напади на 230 места во Газа

АНКАРА (АА) - Израелската Армија соопшти дека во последните 24 часа извршила воздушни напади на околу 230 места во блокираниот Појас Газа, јавува Анадолу.

И покрај светските повици за прекин на огнот и продлабочената хуманитарна криза во регионот, Израел продолжува со нападите во Појасот Газа.

Израелската Армија, која изврши копнен напад врз Хан Јунис на југ, како и на северот на Газа, продолжува со бомбардирањето.

Во писменото соопштение на Армијата се наведува дека во последните 24 часа израелските авиони извршиле напади на околу 230 места во Газа.

Се тврди дека погодените места биле „цели“ на бригадите Ал-Касам, вооруженото крило на палестинското движење Хамас.

Повеќе од 20.000 Палестинци се убиени во израелските напади од 7 октомври, соопшти вчера Министерството за здравство во Газа.

Повеќе од 8.000 од убиените во нападите се деца, а 6.200 жени.

Околу 52.600 Палестинци се повредени во тековните израелски напади.

Во соопштението се наведува дека под урнатините има околу 6.700 луѓе.