Израелски беспилотни летала прелетаа над Бејрут, со што е направено ново прекршување на договорот за прекин на огнот

ИСТАНБУЛ (АА) - Беспилотните летала на израелската армија денес прелетаа над либанската престолнина Бејрут и неговото јужно предградие, при што е направено ново прекршување на договорот за прекин на огнот што стапи на сила минатиот месец, објавија државните медиуми, пренесува Анадолу.

Либанската национална новинска агенција (ННА) утринава соопшти дека израелските беспилотни летала летале на мала височина над Бејрут и неговото јужно предградие.

Израелската армија вчера изврши најмалку 12 прекршувања на прекинот на огнот.

Според ННА, прекршувања на договорот се направени во областите Тир, Марџајун и Хасбаија во Јужен Либан и во областите Рачаја и Западна Бека на истокот на земјата.

Во прекршувањата има воздушни напади, напади со беспилотни летала и борбени авиони, уништување домови и улици и артилериско гранатирање.

Во областа Тир нападот на израелското беспилотно летало бил насочен кон автомобил во градот Мајдалзун, при што се повредени три лица.

Израелската армија, исто така, уништи голем број патишта и дом во градот Накура. Уништени се и неколку домови во градот Кфаркела.

Погодени се градовите Кфаршуба, Халта и Шеба во областа Хасбаија, а воени авиони летаа над областите Рачаја и Западна Бека на средна височина.

Либанските власти пријавија околу 249 израелски прекршувања на примирјето откако стапи на сила на 27 ноември.

Според извештајот на Анадолу заснован врз податоците на Министерството за здравство, оттогаш се убиени најмалку 30 луѓе, а 37 се повредени во израелските напади.

Во рамките на прекинот на огнот од Израел се бара да ги повлече своите сили јужно од Сината линија, во фази, а либанската армија треба да се распореди во Јужен Либан во рок од 60 дена.

Според либанските здравствени власти, во израелските напади врз Либан убиени се над 4.000 луѓе, повеќе од 16.500 се повредени, а над еден милион се раселени од октомври 2023 година.