Rania R.a. Abushamala
30 Мај 2024•Ажурирај: 31 Мај 2024
КУДС/ЕРУСАЛИМ (АА) - Израелската војска ќе им даде повеќе оружје на илегалните еврејски доселеници на Западниот Брег, објави денес израелски медиум, пренесува Анадолу.
„Израелската војска објави дека ќе дистрибуира дополнителни пушки (митралези) на Западниот Брег“, објави израелскиот Канал 7.
Планот следува по извештаите за пукање во илегалните населби во близина на Тулкарм во северниот дел на Западниот Брег и убиството на двајца израелски војници што беа прегазени во близина на Наблус, во северниот дел на Западниот Брег.
„Претставник на Централната команда на израелската војска (неименуван) објави на состанокот на Комисијата на Кнесетот за Јудеја и Самарија (Западниот Брег) дека пушките ќе им бидат поделени и на жителите што не се припадници на резервната единица, со цел да се зајакне безбедноста“, додаде каналот.
На крајот на минатата година израелскиот министер за национална безбедност Итамар Бен-Гвир започна кампања за вооружување на Израелците, вклучително и на илегалните еврејски доселеници на Западниот Брег, тврдејќи дека тоа требало да обезбеди заштита од палестински напади.
Оружјето е дистрибуирано меѓу илегалните доселеници и резервните војници во израелската војска, без да се прецизираат количините поделено оружје.
Во меѓувреме, претседателот на Комисијата на Јудеја и Самарија и член на Кнесетот од екстремно десничарската Религиозна ционистичка партија, Цви Суккот, рече: „Одлуката да се дистрибуира повеќе оружје во населбите Јудеја и Самарија е значајна и ќе го зајакне чувството на безбедност.“
Во изјавата за Канал 7 тој ги повика доселениците што сакаат да учествуваат во одбраната на своето место на живеење да поднесат барања за носење оружје, наведува каналот.
Се проценува дека на Западниот Брег, вклучително и Источен Кудс, има околу 720.000 илегални еврејски доселеници.
