Израелски медиуми: Нетанјаху ќе ја прошири воената операција на Северниот фронт со Либан

КУДС (ЕРУСАЛИМ) (АА) - Израелскиот премиер Бенјамин Нетанјаху донесе одлука да ја прошири воената операција на Северниот фронт со Либан, пренесува Анадолу.

Израелсиот Канал 13 објави дека Нетанјаху ја дал изјавата за време на седницата за стратешки дијалог одржана во четвртокот на која се разговарало за ескалацијата на Северниот фронт, без да ги прецизира страните вклучени во седницата.

Израел е „на работ на широка и силна операција на Северниот фронт“, рече тој.

Каналот цитираше неименуван висок функционер од Кабинетот на Нетанјаху кој рече: „Сè уште не е одреден датум“ за ескалацијата „но се очекува во блиска иднина“.

Се додава дека Кабинетот треба да се состане следната недела за да разговара за ескалацијата.

Во извештајот се истакнува дека неименувани израелски безбедносни претставници рекле дека проширувањето на војната на Северниот фронт ќе бара истовремено намалување на военото присуство во Појасот Газа.

Официјалните лица предупредија дека секој потег за промена на моменталната ситуација во северен Израел „може да доведе до војна од големи размери“.

Извештајот дојде кратко откако заменик-генералниот секретар на Хезболах, Наим Касем, рече дека израелската закана за војна против Либан „не нѐ плаши“ и тој го предупреди Тел Авив дека ако избие војна, стотици илјади Израелци би можеле да побегнат од „населбите на долг дострел.“

Говорејќи во Бејрут, Касем рече: „Немаме планови да започнеме војна бидејќи не ни е од корист, но ако Израел започне војна, ќе се спротивставиме со војна, а загубите ќе бидат големи и за нас и за нив“, пренесе либанската Национална новинска агенција.

Речиси 120.000 Израелци се евакуирани од север и југ од почетокот на нападот врз Газа. Тие се префрлени во хотели во различни делови на Израел.

Тензиите се зголемија долж границата на Либан со Израел поради прекуграничните напади меѓу Хезболах и израелските сили додека Тел Авив продолжува со офанзивата против Газа во која од октомври минатата година досега загинаа над 41.100 Палестинци.