РАМАЛА/ГАЗА (АА) - Илјадници Палестинци во окупираниот Западен Брег и Газа протестираа против рацијата во градот Наблус, во кои израелските сили убија 11 лица, јавува Анадолу.
Илјадници луѓе се собраа во раните утрински часови на плоштадите на Западниот Брег и Газа на повик на една палестинска група.
Протести се одржаа во Рамала, Силван, Неби Салих, Наблус, Џенин, Тулкерим, Калкија на окупираниот Западен Брег, додека во Појасот Газа кој е под блокада, се одржаа во центарот на градот Газа и бегалскиот камп „Џибалија“.
Демонстрантите протестираа поради убиството на 11 Палестинци и против рациите на израелските сили во Наблус и ги повикаа палестинските вооружени групи да одговорат на нападот.
Десетици млади луѓе во подрачјето на Неби Салих маршираа кон воениот контролен пункт на Израел. Израелските сили интервенираа со гасни бомби против демонстрантите, a неколку лица беа погодени од гасот.
Во соопштението на палестинската група се вели дека Палестинците се подготвуваат да одговорат на Израел.
Израелските сили на 22 февруари извршија рации на неколку точки во градот Наблус, кој се наоѓа на северот на окупираниот Западен Брег.
Израелските војници кои опколија куќа во историската област на Стариот Град на Наблус истрелаа вистински куршуми кон Палестинците кои протестираа поради рациите, убивајќи 11 Палестинци, меѓу кои едно дете, две постари лица, а повредија над 100 други Палестинци, од кои 6 се во тешка состојба.
Според официјалните палестински податоци, од почетокот на годината, 65 Палестинци се убиени, од кои 13 деца, на окупираните територии како резултат на отворен оган од страна на Израелската армија и еврејските доселеници.
