Ирак и Турција дискутираа за зголемување на обемот на трговската размена

БАГДАД (АА) - Ирачкиот трговски министер Ал Џабури и турскиот амбасадор Фатих Јилдиз во Багдад дискутираа за начините преку кои би го зголемиле обемот на трговска размена меѓу двете земји, пренесува Агенција Анадолија (АА).

„Ирачкиот министер и турскиот амбасадор ги разменија своите мислења за билатералните, економските, трговските и инвестициските односи“, се вели во соопштението на ирачкото Министерство за трговија.

Ирак се надева дека ќе ги привлече турските инвеститори да работат заедно на проектите за производство и инвестиции кои можат да придонесат за зголемување на трговската размена меѓу двете земји.

„Турција ужива угледно место во Ирак, бидејќи е важна соседна земја што има историски и трговски врски со Ирак“, изјави Ал Џабури.

„Турскиот претставник, од своја страна, ја истакна важноста од зголемувањето на трговската размена меѓу двете земји“, се вели во соопштението.

Во февруари Јилдиз изјави дека трговската размена меѓу двете земји достигнала 15,8 милијарди долари во 2019 година.