Burak Bir
09 Јуни 2025•Ажурирај: 10 Јуни 2025
ЛОНДОН (АА) - Ирскиот заменик-министер за надворешни работи Сајмон Харис денес го пофали хуманитарниот брод „Мадлин“, кој тргна кон Газа, но беше пресретнат од израелските сили, нагласувајќи дека е „срам за светот и меѓународната заедница“ што луѓето во Газа гладуваат, јавува Анадолу.
„‘Мадлин’ беше обид да се достават храна и лекови до гладните луѓе во Газа – невооружена, цивилна мисија среде уништување и катастрофални хуманитарни услови“, изјави Харис.
Изјавата доаѓа откако британскиот брод со хуманитарна помош, вклучително храна и формула за бебиња, беше пресретнат и запленет од израелските сили пред да стигне до брегот на Газа. Подоцна бродот беше пренасочен до израелското пристаниште Ашдод.
Харис ја поздрави оваа хуманитарна иницијатива, нарекувајќи ја „моќен симбол“ на итната и неопходна потреба да се стави крај на блокадата за испорака на помош.
„Она што Флотилата го потенцираше е итната потреба хуманитарната помош да стигне до Газа“, додаде тој, оценувајќи дека ова е уште еден обид на израелските власти да ја спречат хуманитарната поддршка.
Харис нагласи дека не треба да биде задача на мали групи цивили да доставуваат помош во Газа, потсетувајќи дека Ирска континуирано повикува Израел да ја укине блокадата и да овозможи неограничен пристап на хуманитарна помош во голем обем.
Повторувајќи дека на ОН и хуманитарните организации мора да им се дозволи самостојно да работат и да си ја вршат својата работа, Харис додаде: „Срам е за светот и меѓународната заедница што луѓето гладуваат во Газа.“
„Прашањето што треба да го поставиме денес не е дали Флотилата имала право или не, туку како дојдовме до оваа точка – дека светот врти поглед од гладните деца во Газа,“ заклучи Харис.
Коалицијата „Флотила на слободата“ го испрати 18-метарскиот брод „Мадлин“ од Катанија, Сицилија, Италија, за да ја пробие блокадата во Газа и да достави помош.
На бродот се наоѓале вкупно 12 лица, вклучително и 11 активисти и еден новинар.
Меѓу нив се францускиот пратеник во Европскиот парламент (ЕП) Рима Хасан, германската државјанка Јасемин Аџар, Хусеин Шуајб Орду од Турција, Тијаго Авила од Бразил, Серхио Торибио од Шпанија, Марко ван Рен од Холандија, Баптист Андре, Рева Вијард, Паскал Мориерас и Јанис Мамди од Франција, шведската климатска активистка Грета Тунберг и новинарот Омар Фајад.
Од почетокот на март Израел ги држи затворени сите гранични премини кон Газа, со што целосно го прекина доставувањето хуманитарна помош, вклучително храна, лекови и гориво, за 2,4 милиони жители на енклавата.
Бродот носел итно потребни резерви за луѓето од Газа, вклучително формула за бебиња, брашно, ориз, пелени, женски санитарни производи, комплети за десалинизација на вода, медицински потрошен материјал, патерици и детски протези, според организаторите.
