Истрагата во Шведска поврзана со терористичката организација ЈПГ/ПКК заврши поради „недостиг на докази“

СТОКХОЛМ (АА) - Шведска денеска ја заврши истрагата на објавите на социјалните мрежи на кои беа прикажани фотографии од таканареченото знаме на терористичката организација ЈПГ/ПКК и нејзиниот осуден водач, Абдула Оџалан, кои беа проектирани на јавни згради во главниот град, јавува Агенција Анадолија (АА).

Според државното радио, полицијата тврди дека нема докази за да се продолжи со истрагата.

Минатата недела, профилите на социјалните мрежи поврзани со ПКК и нејзиниот сириски огранок ЈПГ, споделија фотографии на кои се гледа таканареченото знаме на организацијата и фотографијата на нејзиниот водач проектирани на историската градска сала и спортската арена „Глобен Авичи“.

По реакциите на турскиот амбасадор во Шведска, Хаки Емре Јунт и други лица за пропагандните активности на терористите, Општина Стокхолм поднесе кривична пријава.

Шведска и Финска официјално поднесоа барање за влез во НАТО минатиот месец, одлука поттикната од руската војна против Украина која започна на 24 февруари.

Но Туркије, долгогодишна членка на Алијансата, изрази приговори за кандидатурите за членство, критикувајќи ги земјите дека толерираат, па дури и ги поддржуваат терористичките организации.

Во својата над 35-годишна терористичка кампања против Туркије, ПКК, којашто се наоѓа на листата терористички организации на Туркије, САД и ЕУ, одговорна е за смртта на најмалку 40.000 луѓе, меѓу кои и деца и жени.