Barış Seçkin
13 Јули 2022•Ажурирај: 14 Јули 2022
РИМ (АА) - Италијанскиот премиер Марио Драги истакна дека зависноста на неговата земја од рускиот гас е значително намалена и дека стапката која минатата година изнесуваше околу 40 отсто, оваа година е 25 отсто, јавува Агенција Анадолија (АА).
Драги присуствуваше на вечерата организирана од Асоцијацијата за странски медиуми (Stampa Estera), чија членка е Агенција Анадолија (AA), во историската вила „Аурелиа“ во Рим.
Премиерот Драги, алудирајќи дека претходно претседавал со Европската централна банка, во шега рече: „На вакви настани, од премиерите се очекува полесен говор кој е далеку од очекуваниот. Вие добро го започнавте разговорот со поранешен централен банкар.“
Наведувајќи дека поминале низ различни кризи, Драги рече: „Ужасната руска окупација во Украина, зголемувањето на трошоците за енергија, враќањето на инфлацијата... Но и во оваа ситуација, Италија продолжува да биде силна земја.“
Осврнувајќи се на напорите на Италија да ги диверзифицира своите енергетски ресурси по војната што Русија ја започна против Украина на 24 февруари, Драги рече:
„Зависноста на Италија од рускиот гас е значително намалена. Стапката на увезениот гас која минатата година изнесуваше околу 40 отсто, оваа година е 25 отсто. Набавките продолжуваат, залихите се зголемуваат. Тоа е важно затоа што, на некој начин, ова е плод на стратешката одлука што ја донесовме на почетокот на војната. Италија повеќе не смее да се најде во позиција на стратешка и геополитичка зависност како што беше на почетокот на војната. Тоа е неприфатливо и тоа е нешто што мора да се промени засекогаш. Постапивме брзо во однос на ова прашање.“
Турската новинарка Есма Чакир, претседателка на Асоцијацијата за странски медиуми, изразувајќи го задоволството што се домаќини на премиерот Драги, рече дека сакаат оваа вечера да биде традиционална.
Чакир на премиерот Драги му врачи плакета и нотес од Асоцијацијата за странски медиуми.
