Islam Uddin
26 Декември 2025•Ажурирај: 29 Декември 2025
АНКАРА (AA) – Камбоџа денес ги обвини тајландските воени сили за интензивирање на нападите по должината на спорните гранични подрачја и покрај одржаната прва рунда разговори меѓу двете армии насочени кон намалување на тензиите, објавија државните медиуми, јавува Анадолу.
Говорејќи на прес-конференцијата во главниот град Пном Пен, портпаролката на Министерството за национална одбрана, генерал-потполковник Мали Сочеата, изјави дека тајландските воени операции започнале рано наутро со тешко артилериско гранатирање насочено кон неколку чувствителни локации, меѓу кои и областа околу храмот Преах Вихеар во провинцијата Преах Вихеар, како и областите на храмовите Та Крабеј и Та Моне во провинцијата Одар Меанчеј, пренесе агенцијата „Кампучеа прес“.
Таа наведе дека тајландските сили извршиле интензивни артилериски напади и операции со борбени авиони во раните утрински часови, при што биле истрелани десетици гранати врз селото Чоук Чеј.
Според неа, нападите продолжиле со дополнително гранатирање и бомбашки напади со дронови насочени кон селата Чоук Чеј и Преј Чан.
Засега од Тајланд нема официјална потврда или реакција на изјавите на портпаролката на камбоџиското Министерство за одбрана.
Сепак, вчера тајландската војска соопшти дека открила четири нагазни мини во близина на местото каде што тајландски војник бил повреден откако стапнал на мина во провинцијата Сурин.
„Овие мини беа поставени последователно по должината на трасата што ја користеле војниците и се наоѓаа на само околу 30 сантиметри од местото на првичната експлозија“, соопшти Кралската тајландска армија во објавата на американската платформа за социјални мрежи X.
Најновите случувања доаѓаат откако Тајланд и Камбоџа во среда ги одржаа првите разговори меѓу двете армии во тајландската провинција Чантабури, во услови на обновени судири. Според извештаите, вкупниот број загинати на двете страни достигнал 96 откако борбите повторно ескалираа на 8 декември, еден ден по граничниот инцидент во кој беа ранети двајца тајландски војници.
Портпаролката на Министерството за одбрана на Камбоџа изјави дека и покрај пријавените напади, тимовите од Генералниот граничен комитет Камбоџа-Тајланд денес треба да продолжат со разговори, изразувајќи надеж дека техничките разговори ќе помогнат во обезбедувањето прекин на непријателствата, враќање на регионалната стабилност и олеснување на враќањето во нормална состојба за раселените цивили.
Средбата во средата, која според информациите траела помалку од еден час, претставува прв контакт меѓу воените претставници на двете страни од почетокот на обновените судири.
Тајландските власти соопштија дека во борбите загинале 23 тајландски војници и еден цивил, додавајќи дека уште 41 цивил загинал како „колатерална последица“. Министерството за внатрешни работи на Камбоџа, пак, соопшти дека се убиени 31 камбоџиски цивил.
Речиси еден милион луѓе од двете страни на границата биле раселени откако почнаа обновените судири.
