Riyaz Khaliq Khaliq
24 Март 2023•Ажурирај: 25 Март 2023
ИСТАНБУЛ (АА)
Кина денес соопшти дека американски воен брод „повторно навлегол“ во водите на Јужното Кинеско Море и го предупреди Вашингтон дека таквите провокативни акции ќе имаат „сериозни последици“, јавува Анадолу.
Тан Кефеи, портпарол на кинеското Министерство за одбрана, изјави дека разорувачот со наведувачки ракети „УСС Милиус“ повторно навлегол во територијалните води на Кина кај Ксиша без одобрение од кинеската Влада.
Обвинувајќи ги САД за „поткопување на мирот и стабилноста во Јужното Кинеско Море“, Тан рече: „Акциите на американската војска сериозно ги нарушија суверенитетот и безбедноста на Кина и сериозно го прекршија меѓународното право.“
Веќе втор ден на предупредувања од Пекинг поради американскиот воен брод.
Ден претходно Тиан Џунли, висок полковник на воздухопловните сили и портпарол на командата на Јужниот фронт на Народноослободителната армија (ПЛА), изјави дека неговите комбинирани кинески сили протерале американски воен брод откако навлегол во кинеските територијални води во близина на островите Ксиша.
Повикувајќи го Вашингтон „веднаш да престане со ваквите провокативни дејства“, портпаролот на кинеското Министерство за одбрана, Тан, предупреди дека во спротивно ќе сноси сериозни последици.
Тој истакна дека ПЛА ќе ги преземе сите неопходни мерки за одлучно да ги заштити националниот суверенитет и безбедност и решително да ги одржи мирот и стабилноста во Јужното Кинеско Море.
Топлите води на Јужното Кинеско Море, кои се богати со минерали, долго време се предмет на спор помеѓу Кина и некои регионални земји, при што САД застанаа на страната на земјите што се противат на тврдењата на Кина.
Вашингтон повеќепати влегуваше во ова подрачје со своите воени бродови и борбени авиони под изговорот за слободна пловидба, што Кина повеќепати ја нарече повреда на нејзиниот територијален интегритет.
