Riyaz Khaliq Khaliq
11 Декември 2025•Ажурирај: 13 Декември 2025
ИСТАНБУЛ (АА) – Кинескиот министер за надворешни работи Ванг Ји оваа недела ќе започне тринационална дипломатска турнеја во Обединетите Арапски Емирати, Саудиска Арабија и Јордан, соопшти денес кинеското Министерство за надворешни работи, јавува Анадолу.
Петдневната посета ќе започне утре, а прва станица најверојатно ќе биде Абу Даби, по покана на шефот на дипломатијата на ОАЕ, шеик Абдула бин Зајед ал-Најан.
Потоа Ванг ќе отпатува во Ријад на покана на министерот за надворешни работи на Саудиска Арабија, Фејсал бин Фархан ал-Сауд.
Последната дестинација на неговата регионална турнеја ќе биде Аман, каде што ќе престојува на покана на јорданскиот министер за надворешни работи Ајман Сафади.
Портпаролот на кинеското Министерство за надворешни работи, Гуо Џијакун, изјави дека Пекинг има „длабоко традиционално пријателство“ со овие три земји.
Тој додаде дека Ванг ќе разменува мислења со колегите за билатералните односи, состојбата на Блискиот Исток и други прашања од заеднички интерес, со цел „консолидирање“ на политичката доверба, зајакнување на „синергијата“ и унапредување на билатералните врски.
Ванг и неговите колеги ќе разговараат и за подготовките за вториот самит меѓу Кина и арапските држави, чиј домаќин е Пекинг следната година, рече Гуо. Првиот самит се одржа во Ријад во 2022 година.
Посетата се случува во момент кога Израел и САД се залагаат за иницијатива за воспоставување т.н. „Одбор за мир“ (BoP) во палестинската енклава Газа, која беше под жестоки израелски напади во кои умреа над 70.000 луѓе, најголем број жени и деца, а повредени се повеќе од 171.000 од октомври 2023 година.
Иако израелската војна запре по прекинот на огнот од 10 октомври, Тел Авив во изминатите два месеца неколкупати го прекрши договорот.
Во средата, американскиот претседател Доналд Трамп изјави дека Одборот, составен од светски лидери, ќе биде објавен на почетокот на следната година.
Одборот е клучна компонента во договорот на Трамп за прекин на огнот во опколениот Појас Газа, иако клучните детали, вклучително и неговото членство, сè уште не се објавени. Планирано е да игра помошна улога во администрацијата на Газа според условите на договорот.
Минатиот месец Советот за безбедност на ОН ја усвои резолуцијата поднесена од САД, со која се воспоставува привремен Одбор за мир BoP и Меѓународните стабилизациски сили (ИСФ) се овластуваат да го надгледуваат управувањето, реконструкцијата и безбедносните напори во Газа.
Резолуцијата помина со 13 гласа „за“, а Русија и Кина беа воздржани. Мандатот важи до 31 декември 2027 година.
Пекинг нагласува дека секој аранжман за постконфликтно уредување на Газа мора да се заснова врз принципот „Палестинците да ја управуваат Палестина“, како и на придржување кон решението за две држави.
