Кремљ задоволен од ставот на САД кој ја отфрла можноста за членство на Украина во НАТО

ИСТАНБУЛ (АА) – Кремљ денес соопшти дека е „задоволен“ од ставот на американската администрација која ја исклучува можноста за членство на Украина во НАТО, јавува Анадолу.

„Од Вашингтон на различни нивоа слушнавме дека членството на Украина во НАТО не доаѓа предвид. Ова е нешто што нè задоволува и се совпаѓа со нашата позиција“, изјави портпаролот на Кремљ, Дмитриј Песков, за новинарите во Москва.

Песков нагласи дека Киев не треба да има перспектива за интеграција во воениот сојуз, додавајќи дека членството на Киев во НАТО претставува закана за националните интереси на Русија.

„Токму ова е една од главните причини за тековниот конфликт (во Украина),“ додаде тој.

Тој, исто така, одговори и на изјавата на американскиот претседател Доналд Трамп, кој изрази надеж дека Русија и Украина би можеле да постигнат договор уште оваа недела, велејќи дека Москва останува отворена за изнаоѓање решение за војната.

Песков не прецизираше временска рамка за можно решение за конфликтот.

Претходно вчера, Трамп изјави дека се надева оти двете земји ќе постигнат договор оваа недела за ставање крај на конфликтот, откако 30-часовниот прекин на огнот за Велигден, што започна во саботата во 18 часот по московско време, истече без продолжување.

И Русија и Украина се обвинија меѓусебно за прекршување на прекинот на огнот додека беше на сила.

Од почетокот на мандатот на Трамп во јануари, САД ги засилија дипломатските напори за ставање крај на над тригодишната војна, одржувајќи директни разговори со Москва и Киев.

Трамп во петокот изјави дека преговорите меѓу Украина и Русија „влегуваат во клучна фаза“, но предупреди дека САД ќе ги прекинат напорите за прекин на огнот доколку „една од страните значително го отежни процесот.“