Лавров: „Нападот на Израел врз иранските цивилни нуклеарни постројки би бил сериозна провокација“

МОСКВА (АА) - Рускиот министер за надворешни работи, Сергеј Лавров, денес предупреди дека израелскиот напад врз иранските цивилните нуклеарни постројки ќе претставува „сериозна провокација“, јавува Анадолу.

Говорејќи на прес-конференција во Виентиан, Лаос, Лавров нагласи дека и покрај зголемените тензии, Меѓународната агенција за атомска енергија, која внимателно ги следи нуклеарните активности на Иран, не пријавила знаци на милитаризација во рамките на нуклеарната програма на Исламската република.

„Ние претпочитаме да се водиме од факти. Речиси во секоја земја има политичари и парламентарци кои изразуваат ставови кои не ја одразуваат практичната стратегија или актуелните политики на нивните влади. Го видовме ова многупати досега“, рече тој.

„Доколку се остварат какви било планови или закани за напад на мирољубиви нуклеарни постројки на Исламската Република Иран, тоа навистина би било многу сериозна провокација“.

Оваа недела, иранскиот Парламент посочи дека земјата може да размисли за повлекување од Договорот за неширење на нуклеарното оружје (НПТ), предвидувајќи потенцијален ракетен напад од Израел.

Израел продолжува со воздушните и копнените напади во Либан, а исто така извршува напади во Газа.

Минатата недела Иран лансираше проектили кон Израел како одмазда за атентатот на шефот на Хамас, Исмаил Ханије, и лидерот на Хезболах, Хасан Насрала.

Израелскиот премиер Бенјамин Нетанјаху вети дека Иран ќе „плати“ за нападите.

Како одговор на изјавите на неколку украински претставници за можни мировни преговори со Русија, Лавров рече дека Москва допрва треба да види сериозни предлози.

Лавров, исто така, ја критикуваше Јапонија за нејзините неодамнешни чекори кон ремилитаризација, како и за напорите на САД да создадат конфронтирачки сојузи во Азија насочени кон задржување на Кина, вклучително и во економската сфера.