Медиуми: САД го насочуваат вниманието кон Куба по Венецуела

ИСТАНБУЛ (АА) – Администрацијата на американскиот претседател Доналд Трамп, охрабрена од отстранувањето на венецуелскиот претседател Николас Мадуро, го насочува вниманието кон Куба и бара сојузници внатре во кубанската власт кои би можеле да помогнат во преговори за крај на комунистичкото владеење во земјата до крајот на годината, објави „Волстрит џурнал“, повикувајќи се на извори, пренесува Анадолу.

Според американски функционери, кубанската економија е на раб на колапс, а Владата е особено ранлива поради губењето на клучната поддршка од Венецуела, се наведува во веста.

Иако не постои детален план за разбивање на режимот, официјални лица го гледаат апсењето на Мадуро и последователните отстапки како модел, но и како предупредување за Хавана.

„Силно им препорачувам да склучат договор. Пред да биде предоцна“, напиша Трамп во објава на социјалните мрежи на 11 јануари, додавајќи дека „нема повеќе нафта или пари“ за Куба.

Според извештајот, американски претставници одржале средби со кубански емигрантски групи во Мајами и Вашингтон со цел да идентификуваат лица во рамките на кубанската Влада кои би биле подготвени за преговори.

Операцијата за приведување на Мадуро, наводно, била олеснета од лице одвнатре, а американскиот воен напад во Каракас резултирал со смрт на 32 кубански војници и разузнавачи кои го штителе венецуелскиот лидер, се додава во извештајот.

Иако САД отворено не се заканија со воена акција против Куба, официјалните лица велат дека нападот во Венецуела имал за цел да сигнализира потенцијални последици од непослушноста, се вели во извештајот.

Разузнавачките проценки ја опишуваат економијата на Куба како катастрофална, со недостиг на стоки, лекови и електрична енергија. Вашингтон планира дополнително да ја ослабне Владата со прекинување на снабдувањето со венецуелска нафта и насочување кон странските медицински мисии на Куба, кои се нејзин главен извор на странска валута.

„Кубанските владетели се неспособни марксисти кои ја уништија својата земја и доживеаја сериозен удар со падот на режимот на Мадуро, кој токму тие го одржуваа“, изјави функционер на Белата куќа, повторувајќи дека Куба треба „да склучи договор пред да биде предоцна“.

Стејт департментот соопшти дека е во национален интерес на САД Куба да биде демократски управувана и да се спречи пристап на непријателски воени и разузнавачки сили на островот.

Дел од американските официјални лица наведуваат дека Трамп претпочита стратегија на силен притисок со простор за преговори, наместо традиционални методи за промена на режимот, се вели во извештајот.

Сепак, многу негови сојузници очекуваат пад на комунистичкото владеење, иако предупредуваат на можни ризици од нестабилност.

Кубанското раководство, пак, преживеа децении американски притисоци.

„Нема можност за предавање или капитулација, ниту за какво било разбирање засновано на принуда или заплашување“, изјави кубанскиот претседател Мигел Дијас-Канел на комеморацијата во чест на кубанскиот персонал кој загина штитејќи го Мадуро.

Во Хавана, сè почестите прекини на струја и недостигот од гориво ги оставаат улиците тивки во текот на ноќта, прекинувани само од звукот на граѓаните кои удираат по тенџериња од своите домови – тивок и анонимен знак на растечко незадоволство.

„Не можете да знаете кој е. Не викаат ништо. Само – удираат по тенџериња“, вели Родолфо Хименез, пензионер кој целиот живот живее на истата улица во Хавана.

„Тоа го прават само ноќе. Луѓето се плашат некој да не ги пријави.“