Rania R.a. Abushamala
16 Ноември 2025•Ажурирај: 17 Ноември 2025
ИСТАНБУЛ (АА) - Суданска медицинска група пријави дека за една недела биле извршени 32 силувања врз девојки кои бегале од градот Ел-Фашер, кој останува под контрола на паравоените Сили за брза поддршка (РСФ), известува Анадолу.
„Некои од девојките беа силувани во Ел-Фашер по преземањето од страна на РСФ, додека други беа нападнати додека се обидувале да избегаат во блискиот град Тавила“, соопшти денес Мрежата на судански лекари.
Тие ги осудија силувањата како јасно кршење на меѓународното хуманитарно право и рекоа дека тие претставуваат воени злосторства и злосторства против човештвото.
„Овие злосторства го откриваат обемот на нарушувањето и систематските злоупотреби со кои се соочуваат жените и девојките во областите контролирани од РСФ, во услови на недостаток на заштита и целосен недостаток на одговорност“, се вели во соопштението.
Медицинската група ги смета РСФ за целосно одговорни и повика на итна, независна меѓународна истрага, итна заштита на преживеаните и сведоците и неограничен пристап за медицинските и хуманитарните тимови кои би обезбедиле грижа, третман и психолошка и правна поддршка.
Во конфликтот во Судан помеѓу војската и РСФ, кој започна во април 2023 година, животот го загубија најмалку 40.000 луѓе, а раселени се 12 милиони, објави Светската здравствена организација.
Минатиот месец, РСФ го зазедоа Ел-Фашер, главниот град на Северен Дарфур, по што следеа обвинувања за масакри од страна на оваа група, која ги контролира сите пет во Дарфур, од вкупно 18 држави во Судан. Војската, од друга страна, ја има контролата над повеќето од преостанатите 13 држави, вклучувајќи го и Картум.
Областа Дарфур сочинува околу една петтина од територијата на Судан, но поголемиот дел од 50-те милиони жители на оваа земја живеат во области кои се под контрола на војската.
