Министерството за здравство во Газа: Индонезиската болница е целосно евакуирана

ГАЗА (АА) - Уште една од листата на болници во Појасот Газа ги испразни своите одделенија и сали - Индонезиската болница во северниот дел на Газа денес соопшти дека е целосно евакуирана, јавува Анадолу.

Ашраф Ал-Кудра, портпаролот на Министерството за здравство во Газа, го објави ова и додаде дека се евакуирани и преостанатите повредени од медицинскиот комплекс Ал-Шифа, најголемата болница во Газа.

„Медицинската помош што влезе во Појасот Газа е недоволна и е многу помала од онаа што влегуваше претходно“, изјави Ал Кудра за Анадолу, велејќи дека помошта што Израел ја пуштил по завршувањето на целосната блокада сè уште е многу помала од итните потреби на над 2 милиони жители на Газа.

Тој предупреди дека „здравствената состојба во Појасот Газа е многу лоша, крајно катастрофална“.

„Нема здравствени установи“, рече Ал Кудра, нагласувајќи дека „само три болници работат со многу ограничени можности во северниот дел на Појасот Газа, каде што живеат околу 900.000 луѓе“.

Израел започна немилосрдни воздушни и копнени напади врз Појасот Газа - вклучувајќи и училишта, болници, џамии и цркви - по прекуграничниот напад на палестинската група Хамас на 7 октомври.

Бројот на загинати Палестинци во израелските напади врз Појасот Газа се искачи на 14.854, според последните информации од четвртокот дадени од владината канцеларија за медиуми во блокираната енклава.