Катар вели дека негов приоритет е да се стави крај на војната во Газа и да се спречи нејзино проширување

ДОХА (АА) - Катар соопшти дека завршувањето на израелската војна во Појасот Газа треба да биде приоритет за да се спречи нејзино проширување во регионален конфликт, пренесува Анадолу.

„Мора да му се даде приоритет на завршувањето на војната во Газа и да се спречи нејзиното проширување, што придонесува за зајакнување на безбедноста и стабилноста на регионално и меѓународно ниво“, рече премиерот на Катар, шеик Мохамед бин Абдулрахман Ал-Тани, за време на средбата со британскиот министер за надворешни работи, Дејвид Камерон, во Доха.

Според соопштението на Министерството за надворешни работи, Ал-Тани повикал на удвојување на регионалните и меѓународните напори за намалување на тензиите во регионот.

На средбата беа разгледани билатералните односи и регионалните случувања, се вели во соопштението.

Камерон пристигна во Доха рано во четвртокот, како дел од регионалната турнеја, во чии рамки ќе ја посети и Туркије. Тој веќе ги посети Израел и Западниот Брег.

Израел започна смртоносна офанзива врз Појасот Газа по прекуграничниот напад на Хамас на 7 октомври, при што загинаа најмалку 25.700 Палестинци, а 63.740 беа повредени. Се верува дека во Израел загинале речиси 1.200 лица.

Според ОН, израелската офанзива остави 85 отсто од населението во Газа внатрешно раселено поради сериозен недостиг на храна, чиста вода и лекови, а 60 отсто од инфраструктурата на енклавата е оштетена или уништена.