Burç Eruygur
29 Декември 2024•Ажурирај: 30 Декември 2024
ИСТАНБУЛ (АА) - Михаил Кавелашвили денес положи заклетва како шести претседател на Грузија на церемонија во Тбилиси, главниот град на земјата, јавува Анадолу.
Кавелашвили, избран за претседател на почетокот на овој месец, положи заклетва во зградата на Парламентот, на која присуствуваа пратеници и владини претставници, јави јавниот сервис 1ТВ.
Во својот говор, Кавелашвили ја истакна богатата култура на Грузија и тешкотиите што таа ги претрпела низ вековите.
Неговата инаугурација доаѓа откако грузиската администрација ги прекина преговорите за членството на земјата во Европската Унија (ЕУ), што ги ескалира тензиите со опозицијата.
Во меѓувреме, претседателката во заминување, Саломе Зурабичвили, им се обрати на проЕУ демонстрантите пред претседателската палата, најавувајќи го нејзиното заминување, но укажувајќи дека во очите на опозицијата и нејзините поддржувачи, таа сè уште е вистинскиот држател на функцијата.
„Пред шест години, дадов заклетва - не само да го почитувам Уставот туку и да се посветам на оваа земја и на вас. Затоа сум овде денес. Оваа лојалност никогаш нема да се промени, без разлика дали стојам внатре во палатата или надвор од неа. Секогаш ќе бидам со вас, каде и да е тоа“, порача Зурабичвили.
Пред заминувањето таа изјави дека го зема со себе „легитимитетот, знамето и вашата доверба“ и вети дека ќе ја продолжи својата борба.
Минатата недела, грузискиот премиер Иракли Кобахидзе изјави дека Зурабичвили мора да ја напушти функцијата на денот на инаугурацијата, додавајќи: „Ајде да видиме каде ќе го продолжи својот живот – зад решетки или надвор“.
Кавелашвили (53) беше избран на 14 декември од Електрскиот колеџ кој брои 300 члена, со замена на директниот претседателски изборен систем воведен во 2017 година.
Сепак, неговиот избор беше нарушен од политичките тензии поврзани со оспорените парламентарни избори во октомври. Грузиски сон обезбеди 89 од 150 места откако доби 53,93 отсто од гласовите.
Зурабичвили, која се смета за наклонета кон ЕУ, одби да ги признае резултатите, наведувајќи го руското мешање, додека опозициските партии рекоа дека гласовите се „украдени“ и ги бојкотираа парламентарните седници.
На 28 ноември, Кобахидзе објави дека Грузија ќе ги прекине преговорите за пристап во ЕУ до 2028 година, што предизвика широки протести низ целата земја, вклучително и во Тбилиси.
