Најмалку 15 загинати од експлозија во џамија во Авганистан

КАБУЛ (АА) - Во експлозијата што денес се случи во џамија во авганистанската северна провинција Бадахшан, животот го загубија најмалку 15 луѓе, а 50 се повредени, пренесува Анадолу.

Експлозијата се случи во џамија во Фаизабад, главниот град на провинцијата Бадахшан, каде што се собрале талибанските официјални претставници на заедничка молитва за убиениот заменик-гувернер, кој настрада од експлозија во вторникот, пренесе локалната телевизија „Толо њуз“.

Информацијата за бројката на загинати ја потврди и локалната болничка управа.

Моазудин Ахмани, локален талибански функционер, претходно потврди дека се случила експлозија.

Мавлави Нисар Ахмад Ахмади, заменик-гувернерот на Бадахшан, и неговиот возач загинаа во вторникот од експлозија во Фаизабад.

Никој засега не ја презеде одговорноста за нападот.